جميع قصائد الشاعرة ( مطلع الشمس )

اليوم عيد ميلادي
*****************

اليوم ذا مو مثل كل يوم ... اليوم ذا عيد ميلادي

هنِّيتْ به يا عزيز القوم ... يا غاية القلب ومرادي

ودِّي تحطَّه ف بالك دوم ... وابغيه في كل سنه يعادي

تاريخ في الذاكره معلوم ... في قلبك مطَّر وغادي

خل البشاير عليه تهوم ... مثل احتفالات لعيادي

إعزم له بدور ويّا انجوم ... محسوب ما هو حدث عادي

إهدي له الورد والمشموم ... والعود والفل والكادي

خل المشاعر عليه تقوم ... وتهيِّض البلبل الشادي

انته وانا والسعد معزوم ... يسمر على جوّنا الهادي

والأمل في عيوننا مرسوم ... ويضوِّي الشمع وينادي

وعمري وعمرك سنين يدوم ... ويبقى الغلا زادك وزادي

واهنّي النفس في ذا اليوم ... مبروك لكْ عيد ميلادي

بلغت روحي سلامك
*****************

بلَّغتْ روحي سلامك يا بعد روحي ... ورَّدتْ بمثله وابيك تبلَّغه روحك

سلِّم عليها سلامٍ عذب مملوحي ... من خاطري وقل لها من قلب مجروحك

هوَّن سلامك عليّه وخفَّف جروحي ... يا ليت قلبك يلين ويكشف وضوحك

حبك بقلبي مُنى عمري ومربوحي ... ويا ليتني يالغلا لك غايةْ طموحك

انته المنى والأمل وانته سبب نوحي ... يا ليتني بلسمك واداوي جروحك

عفت الملا لجل عينك وانت مربوحي ... خلّيتني أكتوي برمضاك وسيوحك

بنت العز
*****************

آنا بنت العز لي طبعٍ مفنَّد ... عن جميع الخود لي حزن المعاني

أسمٍ ورسمٍ ولي أخلاق تحمد ... هامتي في الأرض والعليا مكاني

بنت ابويه وعزّنا مجدٍ مخلَّد ... ذايعين الصيت من قدرٍ وشاني

لي اخْوِيَا شمَّا كما السيف المهنّد ... شفّهم للعز والأوطان باني

والحقير اللي على نفسه تمرَّد ... أحقره وما همِّني واشي وداني

لي حبيبٍ شهم في قلبي تسيَّد ... مالكٍ عقلي ولا أعتاض ثاني

سيِّدي والقلب في حبه مقيّد ... له محبه راسخه داخل كياني

هو سليل المجد قيدومٍ ممجَّد ... من سلالةْ قوم وافين المعاني

تنظره عيني وعن غيره تردَّد ... واحمد الله يوم ربِّي به حباني

والولا والعهد والطاعه أجدد ... للحبيب اللي سكن قلبي وعياني

هو ضيا عيوني لو يقرب ويبعد ... راضي بحبه وهو أغلى الأماني

ومن نظر للشمس كود انّه بيجهد ... طول عمره من لهبها بايعاني

ومطلع الشمس اسم .. عن غيره تفنَّد ... نايفٍ قدري وفي الجوزا مكاني

تاج راسي
******************

أرقب وصالك كل ساعه وكل حين ... يا من ملكت الروح والقلب بِسْكاتْ

حزت الغلا والحب بالطيب والزين ... واصبحت وحدك مالك القلب والذات

صورتك في قلبي وفي ناظر العين ... عيني تشاهدها على كل لوقات

حبك تملَّكني من سنين وسنين ... ما غيّره صرف الزمن والمسافات

حبٍ عفيفٍ راجحٍ في الموازين ... ما هو تسالي ينذكر في الروايات

صادق تميَّز عن غرام المحبين ... وشخصك بقلبي له ميولٍ وغايات

يا بعد عمري يا حبيب المضانين ... يا منبع اشرافٍ وأصلٍ وسادات

يا تاج راسي نفتخر بك وراضين ... عساك دايم في وناسه وراحات

واحنا معاك وبالعهد دوم باقين ... نرقب خطاك وندِّعي بالمرَّات

وابوظبي والعين في ناظر العين ... فيهن ربا زايد حبيب الإمارات

واعطيك من عمري ن العمر عمرين ... والبِّسك ثوب الهنا والشراغات

فالك طيب
******************

فالك طيِّب يا عيوني ... يا أغلى شخص بكوني
تدري انك في قلبي ... وادري انّك مجنوني
فالك طيب يا عيوني

طيبةْ قلبك تكفيني ... يا ساكن قلبي وعيني
لو تِزْعِلْنِي .. ترضيني ... ما تتحمَّل من دوني
فالك طيب يا عيوني

خذني لعيونك زهره ... تسرح فيها بالنظره
يا لون الحب وعطره ... حبك سعدي وسكوني
فالك طيب يا عيوني

يا لون الحب الصافي ... يالقلب الشهم الوافي
يا ثوب العز الضافي ... مالك عقلي وشجوني

لمحت لك
******************

قلبي عليل وقلبك اصحيح ... يسرح ويمرح بالتالي

ما حس بجروح المجاريح ... ولا ذاق همِّي وانشغالي

بين الوناسه والتفاريح ... والفكر م الليعات خالي

وانا وقلبي في تباريح ... نتبع وَهَمْ عسر المنالي

كل ما نصحته آزم يصيح ... ما له على الصبر احتمالي

خايف عليه بسدّه يبيح ... والحب تعصب به الليالي

لمَّحتْ لك مليون تلميح ... أنّك عزيز وشخص غالي

وصرَّحت لك في الشعر تصريح ... وانته ولا عندك مجالي

ما بين متردد ونصِّيح ... عايش هواك ولا تبالي

صدق الوعود يشلَّها الريح ... واللَّه يعلم بالتوالي

هامة العز
***************

ماني من اللي ينحني بالسهوله ... لي هامةٍ يخضع لها العز ويلين

أعرف مواجيبي وشرعي وأصوله ... وأحسب حسابي وأدرك الشين والزين

بنت الأصل بنت العرب والحموله ... بنتٍ لها في مطلع الشمس تبيين

عزمي قويِّ وكل كوكب أطوله ... وأرقى بفكري فوق روس المعادين

لو كان تعني يالغلا ما تقوله ... خل السعادة تبتسم للمحبين

الحق حق ونتِّبع له أصُوله ... ونبعد عن دروب الريا والتلاوين

أتعبتني والوقت شحَّتْ فصوله ... ودِّي الربيع يضمِّني بالرياحين

ودِّي الهنا منِّي قريبٍ وصوله ... والفجر يشرق بالفرح والتلاحين

وصيت قلبي
***********

وصّيتْ قلبي عليك وفكري وظنِّي ... ان غبت عنهم عليك عتابهم هادي

ما ودِّي تجرح شعورك كلمةٍ منِّي ... وانته حياتي وعمري وومهجةْ فوادي

ودي تعيش العمر راضي ومتهنِّي ... مرفوع راسك عليك العز متبادي

يا تاج راسي وانته منِّي وعنِّي ... تامر وتنهي وامرك أول البادي

من كثر حبِّي عليك الخوف يمحنّي ... وافقد شعوري واشوفك غاية مرادي

ان غاب صوتك أناجي الليل واونِّي ... واتخيِّلك واتذكّر هامةْ بلادي

مديون لك بالغلا والحب متجنِّي ... يا مستحل الفواد العاشق الغادي

من يشبهك في البشر يا ذوقي وفنِّي ... يا راحتي وبسمتي وموتي وميلادي

وصّيتْ قلبي عليك وقال مبلنِّي ... واحذر غيابك على قلبي مَهُبْ عادي

تغروده
***************

حبه ملكني واستحل فوادي

يا بو خليفه شوف حالي غادي

مثل الهشيم المنتظر للوادي

كم له شكيت ولا حصل لي مرادي

حبه بقلبي في الحشا هب عادي

مشغول به في صحوتي ورقادي

ولا عاد أتهنَّا بشربي وزادي

أخاف اضيّع في هواه احْيَادِي

عطني جوابك يالفهيم بْحَادِي

لا هِنتْ يا سيدي وسيد اسيادي

حالي الذوق
***************

عطني غلا واعطيك عمري وحالي ... حبٍ مخلّد ما حلم فيه مخلوق

يا شاغل احساسي وعمري وخيالي ... يا من لقلبي بلسم الجرح والعوق

مِنْك الوفا يكفي وهذا منالي ... في دنيتي يا حالي الطبع والذوق

أرقب وِفَاكْ وحايره في سؤالي ... واحس اني دون شوفتك مخنوق

بعدك يعذبني .. يزيد انشغالي ... الله يعين ويفرج الهم بشفوق

في وحدتي أجلس أعد الليالي ... واسهر معاها لين طلعات لشروق

صوتك يصبِّرني ويرثي لحالي ... أسْتَر به ويخفف الهم والشوق

وان شفت طيفك أبتهج باحتفالي ... واسرح لحد الصبح ينساب وافوق

عجّل بوصلك وِافْتِهم ما جرالي ... وان مِتْ انا أفداك يا حالي الذوق

حكمة الأقدار
***************

أنا أعلم وانت لو تعلم بخافي القلب والأسرار ... أنا لك بحت بسدودي وأعلن للملا سرِّي

أنا العاشق أنا المغرم لأجلك أكتب الاشعار ... أترجمها بإحساسي يجول بخافي الصدري

غناتي آه لو تدري عن شعوري وعن الافكار ... عن اللي دار في بالي عن الدمعات لي تجري

أرى الأيام تتلاحق أنا اللي في الهوى صبَّار ... على شانك أروِّضها ظروفي وابدي بعذري

أهوِّن من شقى ايامي واساير حكمةْ الاقدار ... أنا اللي في بحر لوهام ضايع يا غلا عمري

خطاك الشر
***************

خطاك الشر يا عمري خطاك ... عسى عمرك تفاريح وربيع

وِتِصْحَبكْ السلامه في خُطاك ... وقال السعد لك دايم رِبِيْع

ترى مالي هوى إلاَّ هواك ... أنا احبك ومن غيرك أضيع

حبيبي ومطلبي دايم رضاك ... صوابك ضيَّق الكون الوسيع

أحسبك يا عسى عمري فداك ... وشانك يالغلا عندي رفيع

تأثَّرتْ بصوابك من غلاك ... وعشت بحسرتي مثل الوديع

اصبِّر قلبي وفكري معاك ... أهوجس فيك يا حلمي البديع

اطرِّش لك خيالي في مساك ... يطمِّني وبعلومك يذيع

روحي تحبك
****************

روحي تحبك والغلا ذابحنّي ... ودي بشوفك يا حياتي ولاماك

حبٍ قديمٍ في الضماير سكنّي ... داخل حنايا القلب رسمك وموطاك

أهواك أنا ولا حد غيرك فتنّي ... لك صادق الإحساس والعمر يفداك

أهواك يا ساكن بفكري وظنِّي ... طيفك يشاغلني وادوِّر على رْضَاك

أصون حبك بالغلا لو محنّي ... غالي معي يا كبر حبك ومَغْلاك

إنته وانا والأصل منّك ومنّي ... كل السعادة والأمل في محيّاك

حكم الزمن مبعدك يا زين عنّي ... روح المشاعر تشتكي طول فرقاك

بادر بوصلك ما يفيد التمنّي ... وانا مقدِّر لك ظروفك وارعاك

روضة الجنة
***************

دار زايد روضةْ الجنّه ... مورده بالعز محلاها

تبتسم .. حلوة ومِطْمِنّه ... والبشاشه في محيّاها

ما شكت من وقتها انّه ... شيخها بالخير غَطّاها

عَزّها زايد بلا منّه ... واستتب الأمن بحماها

دار زايد روضةْ الجنّه ... وشعبها بالعمر يفداها

سر الغرام
************

كنِّي خطا جيتك وقلبي أحْمِلَه ... حالي شغوف ولا تناظر لهفتي

سر الغرام اللي بقلبي تجهله ... وانته غرامك في حشايه ومهجتي

أنا عطيتك من غرامي أجمله ... وانته ولا حتى تحس بلوعتي

لو كان تدري بلِّي قلبي يحمله ... حبٍ صدوقٍ وانت عمري ومنيتي

حبٍ وفيٍ كل اقوله وارسله ... عبر الحروف وينقرا في نظرتي

ليلي سهر .. ليلي حزن ما أطوله ... لولا طيوفك به تخفِّف علِّتي

أسمع صدى صوتك وقلبي يسأله ... والقى ردودك هي عذابي وحيرتي

رجواك انا رجوى الليالي المقبله ... خل السعاده تبتسم في دنيتي

ملّيت من صبري وكثر الأسئله ... ودي أحس بطعم وقتي وراحتي

وانِّي بقلبك لي مكان ومنزله ... واهنا بحبِّي وتحقَّق فرحتي

يا ضي عمري وراحته ومستقبله ... يا تاج راسي لا تزوِّد حسرتي

شوف لاخيار
****************

يا بو خليفه العيد عيدين ... وثالث اعيادي شوف لَخْيَار

غايب وعوَّد عقب شهرين ... واستبشروا به القلب والدار

في خافقي حبَّه من سنين ... متملِّكنَّي ملك جبَّار

حاز الغلا عن كل حيِّين ... غالي معي لو صار ما صار

شوفه غناتي يسعد العين ... ويفرِّح الضيقه ولَكْدَار

في ناظري تاج السلاطين ... وعيوني الثنتين له دار

ما يختلف في شخصه ثنين ... نشمي واخو شمَّا ومغوار

لو في يدي ما فارق العين ... عين البنفسج دار لَحْرار

زايد وضعها في البلادين ... واحةْ زهر وعيون وانهار

عيال زايد
******************

الوطن زايد وسيف العز زايد ... زايد التاريخ بافعاله العِظَام

من نسل شجعانٍ قرومٍ شدايد ... في عتوم الوقت ذكره لا يضام

عزِّنا وهو للوطن يا خير قايد ... يا حكيم العرب يالفذ الهمام

إلْبِسَتْ بك دارنا أحلى قلايد ... واصْبَحتْ من حكمتك دار السلام

يا مزن يا غيث يا راعي العوايد ... يا معاني ما يوصِّفها كلام

يا سند داري وأهلي والسعايد ... يا ملاذ الحب والناس الكرام

لو تبا بعطيك عمري عمر زايد ... كل شيء يفداك أهلي والعمام

يا عسى تبقى لنا سنين مدايد ... يا عسى تبقى لنا مليون عام

نفتخر ونقول نحن عيال زايد ... وزايدٍ ع صدورنا أعلى وسام

قلايد
*************

قلايد جبتها من بحر فكري ... وصاغتها حروفي لك قلايد

لاجل عينيك يا شمسي وبدري ... أسجِّلها وأدوِّنها قصايد

ترافقني مثل ظلِّي وعمري ... وتكتبني بيسري والشدايد

يحرِّكها غرام وحب عذري ... أقلِّل قيمته وألقاه زايد

مثل المطر
*************

أقبلت تمشي ومشيتها كنه الخيل ... ترفل وابوها بالمعزه حماها

مثل المطر شفافة كنها سهيل ... أو وَجْنَةْ القمرا بعالي سماها

مزيونةٍ فيها النواعس مظاليل ... كن الليالي ماخذه من مساها

شفَّافةْ الخدّين في غنجها تميل ... كن النسايم ميّلتها معاها

وجناتها تشبه ورود الأكاليل ... ورده نديَّه والبنفسج شذاها

دانه ثمينه ما لها من مواصيل ... تسبي العقول ونايفٍ مستواها

الله ايْحَفِظْهَا باليسر والتساهيل ... في عز ابو زايد وتبلغ مناها

سكَّنتها في القلب واحبها حيل ... ودي اكحِّل ناظري بملتقاها

هلا وغلا
*****************

هلا وغلا يا بعد روحي ... يا مرحبا يا بعد كل حي

طَلْعَتكْ تبعث لي شروحي ... يا نور عيني وسحر الضي

حبك بقلبي بنى صروحي ... في وسط قلبي وليّه لَيْ

انا متيَّم ومجروحي ... وانته النسخ والهوا والفي

يا قمر ليلي ومربوحي ... نروك يضوِّي بكل الحي

فرقاك تارِّث لي جروحي ... ارحم غريم الهوى يا خي

اشتاق لك وانت بِنْزُوحِيْ ... شوق الصحاري لشوق المي

يا ليت لي طيفك يلوحي ... لانَّك معي راحتي وكل شي