منتديات مدينة الاحلام

منتديات مدينة الاحلام (http://m.dreamscity.net/)
-   ملتقى اهل المدينة (http://m.dreamscity.net/f30.html)
-   -   امثال جزائرية رايعة ..... موضوع من عندي (http://m.dreamscity.net/t54978.html)

الزين 10 - 09 - 2011 02:21

امثال جزائرية رايعة ..... موضوع من عندي
 


اهلين وسهلين ومرحبتين ... ان شاء الله راكم كامل ملاح .... وتكونو دايما هاكا يارب .....

اليوم جبتلكم من هنا وهناك بعض الامثال الجزائرية المتداولة في حديثنا اليومي

مع شرح بسيط من عندي لمعناها او لموضع قولها .....

علما اني كتبت الموضوع من راسي .. يعني من الواقع ومن كلامنا المتداول يوميا .......

اتمنى لكم قراءة ممتعة

:n200674[1]::n200674[1]::n200674[1]::n200674[1]:



1. كل واحد يعوم بحره
يضرب لمعنى ان كل واحد يتحمل مسؤوليتو ونتايج افعالو

2.حوحو يشكر روحو
يضرب للتبيين ان الاخرين هم من يجب ان يقيموك ويقدورك ولست انت من تمدح نفسك

3.كل محنة تزيد فالراس فهامة
يضرب للتعبير عن ان المحن تثمر خبرة

4.اخدم باطل ولاتقعد عاطل
هذي واضحة هههه وكاين متل يشبهه يقول... معاونة النصارى ولا القعاد خسارة

5.طير الليل ..مع الطير يخرج جنحيه ومع الفار يبين وذنيه

طير الليل هو الخفاش .. مع الطيور يقول انا طائر ومع الفئران يقول انا فار ... كناية عن النفاق

6.عيش نهار سردوك ولا ماية سنة جاجة

السردوك هو الديك والجاجة طبعا هي الدجاجة

7.الخطاب رطاب
هذي باينة .. كل من يجئ للخطبة يظهر فقط المحاسن

8.ياكل مع الذيب ويبكي مع الراعي

هذا يضرب دلالة على ذو الوجهين

9.كل هلال وفيه لولة

يضرب دلالة بأن كل شخص وعندو عيب

10.قالو الشادي حلب ... قالو باين على وجهو

استهزاءا ... قالو القرد جاب حليب .. قالو مبين من وجهو .. يعني اصحاب الخير يبانو من وجههم

11.قالك الكلوفي فوق الجمل عضو كلب

الكلوفي هو المتطفل.. غالبا ماتلحقه الاضرار مع انه في الاصل غير معني بها

12. دبارة الفار على مول الدار

تدبير الفار على صاحب البيت ...دلالة على سوء النصح.. ويقال ان تدبيرته كانت ... بيع القط واشري القمح هههههه

13.اللي خانها السعد تقول السحور بيا

دلالة على الذين يتحججون بالقدر والظروف وغيرها

14.على خيرك يارمضان نصوم عواشرك

الحقيقة ان معناه بالعكس .. يقال للي عمل فيك الشر وبعدين جا يطلب مساعدة

15.جا يطل طاح
تقال للذي يذهب الى ميدان بعيد عنو تماما ولاينجح فيه

16. هربت من الحبس و طحت في بابه

يعني نجوت من مشكلة ووقعت في اخرى

17.كل خنفوس عند يماه غزال

هههههههه

18.كمشة نحل خير من شواري ذبان

كمشة يعني كمية صغيرة ... شواري عدد كبير

19 اللي ما جاء مع العروس مايجي مع الكرموس
يعني اللي ماكان عندو حظ في الوقت المناسب مايكون عندو حظ في الوقت بدل الضائع

20.سكران ويعرف باب دارو

يعني مهما تغيب عن الانسان اشياء ولكن الاساسيات دايما حاضرة

21.اعطيلو المال ... يعرفوه مواليه
والامتلة هنا كتيرة منها ... المال يدير طريق فالبحر ... المال حطو على وجه الميت يضحكلك

22. الناس لاهيين بالناس والقط لاهي بالراس
يعني مهما كان انشغال العوام كبير فهناك منهم من لايفرط في مصلحته الذاتية

23.سبة ولاقاتها حدورة
سبة معناها حجة ...و حدورة معناها انحدار ... هذي تشبه القطرة التي افاضت الكاس...

24.تشبتشاق ولقى غلاق
التشبشاق هو العلبة ... والغلاق هو الغطاء... تضرب للتعبير عن التوافق

25.جا القط يعلم بوه النط

تضرب عندما يريد شخص حديث في مجال ان يعلم من هو اقدم منه

26. كي سحقيتك يا وجهي ...ندبوك لقطوطا

يعني لما احتجتك يا وجهي ندبوك القطط بمعنى اني فقدت الشيئ عند اشد الحاجة اليه

27.الحمار حماري وانا راكب من اللور

اللور يعني ورا ... عندما تسلب حقوقك في ملكك

28.نهار العيد نعرفكم يا ولادي

الشخص اللي يتصل بالناس فقط عند الاحتياج اليهم

29.بنت الذيب تبكي ...وبنت السبع تسكت فيها
السبع هو الاسد ...وتسكت بمعنى تصبرها... يعني انقلاب المنطق والاصل انو يحدث العكس

30.الهدرة مع الخوخ ...اما السفرجل خناق
بمعنى انو الكلام الطيب مع الاشخاص اللي يستاهلو .... اما الباقي فمالهم نصيب .... واللي ماعرفش واش معناها السفرجل خناق .. نقولو ... جرب عض حبة سفرجل نيئة وقلي واش رايك ....



:n200674[1]::n200674[1]::n200674[1]::n200674[1]:

على ذكر الخوخ نخليكم ونتمنى تكونو دايما بحلاوة الخوخ يا اهل المدينة الاعزاء .....

:n200674[1]::n200674[1]::n200674[1]::n200674[1]:





قاهر الاعداء 10 - 09 - 2011 02:39

رد: امثال جزائرية رايعة ..... موضوع من عندي
 
قاهر يشكر الزين

ههههههههههه
يسلمووووووو الزين علي الامثال

الزين 10 - 09 - 2011 04:02

رد: امثال جزائرية رايعة ..... موضوع من عندي
 
ربي يخليك هههههههههههه دايما تفاجأني باطلالتك العطرة

السامي 13 - 09 - 2011 00:14

رد: امثال جزائرية رايعة ..... موضوع من عندي
 
للحظات شعرت انني بالجزائر واتبادل مع اهلها
هذه الامثال

اخي الزين
دائما ماتثرينا بموروثاتكم الثقافية والشعبية

اشكرك جزيل الشكر
فروعتك لاتنتهي

الزين 13 - 09 - 2011 01:05

رد: امثال جزائرية رايعة ..... موضوع من عندي
 
اقتباس:

المشاركة الأصلية كتبت بواسطة السامي (المشاركة 408210)
للحظات شعرت انني بالجزائر واتبادل مع اهلها
هذه الامثال

اخي الزين
دائما ماتثرينا بموروثاتكم الثقافية والشعبية

اشكرك جزيل الشكر
فروعتك لاتنتهي

اتدري سامي ؟؟؟ كلما نحط موضوع نستنى دايما الرد تاعك فيه واش يكون .... ربي يعيشك ويقدرك دايما لفعل الخير ....... كل التحايا ليك عزيزي

المشاكس1 13 - 09 - 2011 01:56

رد: امثال جزائرية رايعة ..... موضوع من عندي
 
مشكور اخوي الزين موضوع ظريف
يسلمو كثير

الزين 13 - 09 - 2011 01:59

رد: امثال جزائرية رايعة ..... موضوع من عندي
 
يعطيك الصحة خويا لعزيز ................ مرورك اسعدني


الساعة الآن 21:04.

Powered by vBulletin Version 3.8.7
Copyright ©2000 - 2024, Jelsoft Enterprises Ltd
ترقية وتطوير: مجموعة الدعم العربى
جميع الحقوق محفوظه لمدينة الاحلام ©


SEO by vBSEO