منتديات مدينة الاحلام

نبرة صوتك الحزين
صحت فيّا حزن دفين
كان نايم جوّايا ، ويّا الحنين
لقيت حزني حس بحزنك
إتمنيت لو أكون جنبك
ألمس خدك
و أمسح دمعك
من قلبي لعنت الفُرقه
و بت أبكي بحُرقه
على حبْ ، إتولد حزين
*
وخدتني ذكرياتي
ل أيام ما كنت معاكي
إفتكرت
حتى و إحنا قريبين
كان برضه ، حبنا حزين
خايفين ، نكشف عنه
و مش قادرين ، نتحرر منه
لكن
أيامها كنا قريبين
من الحب شبعانين
حتى لو كان حزين
*
ياترى تسمح الأيام
يا ترى تتحقق الأحلام
و أشوفك
صوره حيّه قدامي
أشبع بيكي
في صحوي و منامي
كفايه أكون جنبك
قلبي قريب ، من قلبك
حتى لو مليناهم أسرار
ينبضوا بالحب ، و مش أحرار
كفايه
و إحنا قريبين
بنحلم مشتاقين
ل يوم
يفرح فيه الحب الحزين
.........................
( تمت )
كلمات ... أنسي المصري